Tschibtschakere thana
Uso koncepto le tschibtschakere thanendar:
O flogoskere ischkolakere tschave ande jek khelipeskero than jek avri tschib schaj te prindscharel siklon, so jek barikano koja uso, angle dimo barikano orijentirimo tschibtschakero sikajipe andi ischkola sikal. Le keripeskere orijentirime tschibtschakere famitlinipeha o siklojaschi/i siklojaschkija aktivi ando sikajipe vaj andi kerdi situacija ande cidim ol: o tschave mindenfelitike situaciji te kerel te dschanen.
O cile thana andi KUGA upre maksimal 60 minuti ar paschlarde hi, kaj sakona le 4 schtacijonendar, 10-15 minuti del. Saki ischkolaschtschengeri grupn (5-7 tschave) jeke murschestar/jeka dschuvlatar andi schtacijona pomoschago uschtidel.
Cil:
Adale keripeha, savo le tschavenge ando flogoskero ischkolakero than o gondo vasch i eksitenca avre tschibtschendar taj kulturendar te soraljarel, papal jefkar pijoniriskeri buti ando Burgenland kerdo ol. Kaj ando ischkoli ando tradicijoneli avrethemutno tschibtschakero sikajipe meg mindig tschibtscha sar o englitiko, francitiko, espanitiko taj italitiko butvar andi erschti rik terdschol, but avre tschibtschenge tschak tschulo than ando ischkolakero dipe dim ol.
Vaschoda duach o dschando andbescharipe asaj na but prindscharde, poarenge (na tschatsche) tschuleder aktraktivi angle ale tschibtscha uso tschibtschakere thana na tschak o nevipe le tschavendar avre tschibtschenge te dschangarel, hatek te o duj tschibtschakero vakeripe taj i khetan phandli bikulturaliteta bare falatendar le Burgenlandistar papal sikade te on.
Le tschibtschakere thana andi KUGA meg o latscho koja hi, hot o khetanphandlipe le tschibtschakere taj kultureli dschaniptschendar taj te o andbescharipe autentischi siklipeskere situacijendar dim hi. I tschib oni siklipeskeri kenva ando khelipeskero than butvar dajakere tschibtschakere vakeraschtschendar bajder dim ol. I tschib le cile kojenca terdschivdi te ol. Afka ando mindenfelitike tschibtschakere schtacijontscha habe, pipe, esbe lipe, khelipe, dschilavipe del, … Ada autentischi andvodinipe o erschti koja le hajojipeske avre tschibtschendar taj kulturendar hi. Vaschoda jek avro cil adale projektostar hi, dombi uso praktischi keripe le avrethemutne tschibtschendar tel te bauninel. Erschti kontaktscha use na prindscharde avrethemute tschibtscha taj/vaj flogoskere grupnengere tschibtscha prik dim te on.
O jekeschne tschibtschakere khelipeskere schtacijontscha na latscharen tschak o kognitivi entviklinipe le tschavendar, hatek te jek motivacijonakero ispidipe uso siklipe avrethemutne tschibtschendar te del.
O dschanipe jeka avra tschibtschatar vaj buteder tschibtschendar na del tschak o andikipe ande avre kulturtscha, hatek ando cilo (ajgeni entviklinipe, siklipeskero proceso, butjakero them) jek barikano barvalipe anel, hatek akor, te ande jek duj- vaj but tschibtschakeri regijiona sar o Burgenland dschis. Hatek adaj o schajipe del, le tschavenge ada terdschijipe le avre tschibtschendar anglo khereskero vudar te del te dschanel.
Tschibtschakero siklipe ande amari adiveseskeri cajt igen barikano ulo. O koji jeke bartschojipeskere interesijistar upro avrethemutne tschibtscha, mindenfelitiko schaj ol: Jek utscheder tschibtschakero gondo telal o dschene, o soraleder palal phutschajipe dschenendar save jek slavitiki tschib vakeren, o EU-jakero ostbulharipe, jek globalisirimo proceso taj na te o tschatschipe, hot duach o nochberipe usi Slovakija, Slovenija, uso Ungriko taj Horvacko, o dschanipe mindenfelitike tschibtschendar dim hi.
Tschibtschakere thana 2024
Emmerich Gärtner-Horvath – romani
Me man mindig loschanav tschavenca taj ternenca te butschalinel. Len igen but interesi hi i tschib te siklol. I Romani tschib dschi ando bersch 1993 mujon bajder dim uli. La Karl-Franzens universitetaha Gereci i Romani tschib tel pisim uli taj akan o cile schaj la siklon.
Alle Projekte